* أفتخر إني عاصرت و شاهدت ثورة 25 يناير بعيني و بوجودي في الميدان طيلة ال 18 يوم من يوم 25 و حتي يوم التنحي.
ما قبل 25 يناير كنت دايما بقول انا بحب مصر (كلمة و السلام) دلوقتي بقولها بحبك يا مصر بطعم تاني - طعم جديد و حلو - حاسة اني بقولها و انا بفتخر بجنسيتي كمصرية - خلاص مبقاش فيه خوف و لا تعنت - مبقاش فيه جهل
بتكلم براحتي مفيش كلمة بتوقف في حلقي و ابلعها - لا بطلعها و أنا مش خايفة.
شايفة امامي مستقبل جديد - أي كان هذا المستقبل بمتاعبه و مشقته و بدايته الصعبة و لكن أتطلع في الاخر إلي مستقبل (جديد) متغير.
* في ايام الثورة و خصوصا يوم 25 و 28 و يوم التنحي , نزلت الشارع بنفسي و بدون ترتيب او تكليف من حد علشان أقول لا للفساد , لا للظلم , لا للجهل , لا للكوسة.
نزلت يوم 25 يناير و انا بحمل اللوحة بتاعتي مكتوب عليها ( إتـــركوا الوطــن يتنفـــس) كنت بقولها الي الماسكين في البلد ايامها.
نزلت يوم 28 علشان أقول اننا نريد أن يسقط النظام ( و الحمد لله النظام بدا يسقط تدريجيا).
* أعتقد إن نظرتي القديمة ( السلبية , التشاؤمية) تغيرت بعد عصر 25 يناير (العصر الجديد) ده أنا حتي بفكر بجدية اغير اسم مدونتي علشان انا دلوقتي عرفت الطريق الصح اللي المفروض امشي فيه و عموما انا بدور علي اسم لمدونتي يكون شبهه احساسي و اتجاهاتي الفترة دي.
لا ادري ماذا سيحدث فيما بعد؟؟؟؟؟ فالكل بمختلف أرائه ما بين سلبي و إيجابي.
و لكن يجب أن أعيش هذه اللحظة (لحظة الفرحة الحقيقية) لحظة أنا عارفة فيها انا عايزة إيه و بتكلم عن قناعة و محدش بيعترضني و لا يقلل من شأني.
و بحبك يا مصر و مليش حد غيرك يا امي يا حبيبتي
****** كتبت في 20/2/2011
